Android’dagi yangi Find Hub funksiyasi muhim buyumlarni qayerga qo‘yganingizni eslatib turadi
Google sentabr oyida Android’ga keladigan yangi funksiyalarni e’lon qildi.
Google sentabr oyida Android’ga keladigan yangi funksiyalarni e’lon qildi. Ular orasida Gemini Live uchun yangi vizual yordamchi va Messages ilovasida Keep integratsiyasi ham bor.
Google Android uchun sentabr oyida taqdim etiladigan yangilanishlarni e’lon qildi. Dastlabki yangilik Find Hub xizmatiga tegishli bo‘lib, xotirasi unchalik yaxshi bo‘lmagan yoki ADHD bilan yashaydigan foydalanuvchilar uchun ayni muddao bo‘lishi mumkin. Endi Android’dagi Gemini AI yordamchisidan muhim buyumlaringiz joylashgan manzilni Find Hub’da saqlab qo‘yishni so‘rashingiz mumkin. Buning uchun alohida mos treker yoki aksessuar kerak bo‘lmaydi.
Masalan, “Hey Google, Find Hub’da pasportimni yotoqxonamdagi shkaf ichidagi seyfga qo‘yganimni eslab qol”, deyishingiz mumkin. Xohlasangiz, bu ma’lumotga surat ham biriktirasiz.
Keyin pasport kerak bo‘lib qolsa, Gemini’dan uning qayerdaligini so‘raysiz — yordamchi buyumni qayerga qo‘yganingizni aytadi. Find Hub’da saqlangan barcha buyumlar va ularning joylashuvini bir joyda ko‘rish ham mumkin. Bu funksiya Android 16 va undan keyingi versiyalarda, Gemini va Find Hub qo‘llab-quvvatlanadigan hududlarda ishlaydi.
Agar telefoningizda Android 17 o‘rnatilgan bo‘lsa, harakat tufayli ko‘ngil aynishini kamaytirishga mo‘ljallangan yangi “Motion Assist” funksiyasidan foydalanishingiz mumkin. U ekran ustiga ichida mayda pufakchalar harakatlanadigan shaffof qatlam chiqaradi. Pufakchalar transport vositasi harakatiga mos ravishda siljib, “ko‘zlar ko‘rayotgan manzara bilan tananing harakatini his qilishi o‘rtasidagi tafovutni kamaytiradi”.
Foydalanuvchi pufakchalarning shakli, rangi va shaffoflik darajasini o‘zgartira oladi. Funksiyani avtomatik yoqiladigan qilib sozlash yoki uni Quick Settings menyusiga qo‘shish ham mumkin.
Android 9 va undan keyingi versiyalarda ishlaydigan qurilmalarga tez orada “Guided vision” funksiyasi ham keladi. U ko‘rishida cheklovi bo‘lgan foydalanuvchilar uchun yaratilgan. Gemini mavjud hududda bo‘lsangiz, kamerani Gemini Live bilan ulab, oldingizda nimalar turganini AI yordamchisiga tasvirlatishingiz mumkin.
Yordamchi yorliqlar va menyulardagi yozuvlarni ovoz chiqarib o‘qib beradi yoki kerakli buyumni topishga yordam beradi. “Guided vision” funksiyasini Accessibility yorliqlariga qo‘shish yoki TalkBack menyusi orqali ishga tushirish mumkin.
Bugundan boshlab Google Messages ilovasida Keep integratsiyasini ham joriy qilmoqda. Bu suhbatlar davomida xaridlar ro‘yxati kabi qaydlarni ulashish imkonini beradi. Chatdagi boshqa ishtirokchilar ham Keep’dagi qaydlarni tahrirlashi va ularga yangi ma’lumotlar qo‘shishi mumkin.
Bundan tashqari, Google bugun Messages uchun mavzular funksiyasini ham taqdim etdi. Endi har bir suhbat uchun alohida ranglar va fon rasmini tanlash mumkin.