Apple AI-agentlar sabab macOS’dagi “Full Disk Access” ruxsatini kuchaytiradi
Apple macOS’dagi “Full Disk Access” ruxsati uchun qo‘shimcha nazorat vositalarini joriy etishini ma’lum qildi.
Apple macOS’dagi “Full Disk Access” ruxsati uchun qo‘shimcha nazorat vositalarini joriy etishini ma’lum qildi. Kompaniya tobora imkoniyati kengayib borayotgan AI-agentlar foydalanuvchilarning fayllari, xabarlari, elektron pochtasi va brauzer tarixiga keng ko‘lamda kira olishi sabab xavflar ortayotganidan ogohlantirdi.
Bu bayonot jurnalist Meta’ning Mac uchun mo‘ljallangan Muse ilovasi shaxsiy xabarlarini o‘qiganini da’vo qilganidan bir necha kun o‘tib yangradi. Meta bu da’voni rad etdi. Shundan so‘ng Apple macOS’dagi “Full Disk Access” deb ataladigan sozlama ustidan qo‘shimcha nazorat joriy etishini e’lon qildi. Mazkur funksiya dastlab zaxira nusxalarini to‘g‘ri yaratish uchun ishlab chiqilgan edi. Biroq Apple’ning ta’kidlashicha, AI-agentlar paydo bo‘lgach, bunday keng ko‘lamdagi ruxsat bilan bog‘liq xavflar oshgan.
Apple bayonoti Inc. kolumnisti Jason Aten’ning xabaridan ko‘p o‘tmay e’lon qilindi. Aten Muse shaxsiy xabarlarining mazmunini bilganini, o‘zi esa AI-agentga bunday ruxsat bermaganini yozgan. Bu xabar kompyuterlarda ishlaydigan, tizimdagi ayrim amallarni bajara oladigan, fayl va xabarlarni o‘qiydigan AI vositalarining xavfsizligi hamda ularga bo‘lgan ishonch masalasini kun tartibiga chiqardi.
Mac’dagi ushbu funksiyani cheklash qarori Wired nashri xabaridan keyin ham qabul qilindi. Nashr ChatGPT’ning Mac uchun mo‘ljallangan ilovasidagi zaiflik xakerlarga maxfiy ma’lumotlarga kirish imkonini bergan bo‘lishi mumkinligini yozgan edi.
Kompyuterda ishlaydigan AI-agentlar foydalanuvchilarga o‘z ilovalariga qurilmadagi fayllar, xabarlar va boshqa shaxsiy ma’lumotlarga kengroq kirish huquqini berish imkonini yaratadi. Buning uchun macOS sozlamalarini o‘zgartirish kifoya.
Muse misolida foydalanuvchi xohlasa, “Full Disk Access” ruxsatini yoqishi mumkin. Apple tushuntirishicha, bu sozlama ilovaga fayllar, elektron pochta, xabarlar va hatto brauzer tarixiga kirish imkonini beradi.
“Ba’zi dasturchilar ‘Full Disk Access’ ruxsatidan foydalanuvchilarga xavf tug‘diradigan tarzda foydalanmoqda. Natijada foydalanuvchilar buni to‘liq bilmasdan va oqibatlarini anglamasdan turib, tizimidagi barcha ma’lumotlarni ochib qo‘yishi mumkin”, — deyiladi Apple’ning dasturchilar uchun e’lon qilingan yangi blog postida.
Kompaniya bundan buyon “ilovaga bunday favqulodda darajadagi ruxsatni ongli ravishda bermoqchi bo‘lgan” foydalanuvchilar buni faqat “juda aniq va bevosita harakat” orqali amalga oshira olishini ta’minlaydigan yangi nazorat vositalarini joriy etadi.
“Bu muammoni hal qilish nihoyatda muhim. AI-agentlar tobora mustaqil va imkoniyatlari keng vositalarga aylanar ekan, bunday darajadagi ruxsat bilan bog‘liq xavflar ham sezilarli darajada ortadi. Biz foydalanuvchilar bunday ruxsatni berishdan oldin xavflarni aniq tushunishiga erishmoqchimiz. Shunda ular o‘z ma’lumotlari va maxfiyligi bo‘yicha ongli qaror qabul qila oladi”, — deb yozdi Apple.
Apple bu o‘zgarish yuzasidan TechCrunch so‘roviga javob bermadi.