Claude Cowork endi chatda aytganlaringizni eslab qoladi
Anthropic Claude chat va Claude Cowork uchun umumiy xotira tizimini joriy qilmoqda.
Anthropic Claude chat va Claude Cowork uchun umumiy xotira tizimini joriy qilmoqda. Shu tariqa foydalanuvchilar loyiha, shaxsiy afzalliklar va boshqa muhim tafsilotlarni AI’ga qayta-qayta tushuntirishiga hojat qolmaydi.
Claude xotira tizimidagi bu o‘zgarish agentlardan foydalanishda eng ko‘p bezovta qiladigan muammolardan birini bartaraf etadi: AI allaqachon biladigan ma’lumotlarni yana boshidan tushuntirish zaruratini. Anthropic seshanba kuni chat va Claude Cowork’da ishlatiladigan xotira tizimlari birlashtirilayotganini ma’lum qildi. Endi Claude bir muhitda o‘rgangan ma’lumotlarini boshqa muhitda ham eslab qoladi.
Anthropic, shuningdek, Claude xotirasida nimalar saqlanganini ko‘rsatadi. Foydalanuvchilar bu ma’lumotlarni ko‘rishi, tahrirlashi yoki istalgan mavzu bo‘yicha o‘chirib tashlashi mumkin.
Yangilanish Claude’dan foydalanishni qulaylashtiradi. Endi foydalanuvchilar tadqiqot bosqichidan amaliy ishlarni bajarishga ancha oson o‘ta oladi.
Avval foydalanuvchi Claude bilan suhbatlar davomida biror loyiha bo‘yicha g‘oyalarni ishlab chiqishi mumkin edi. Ammo ularni amalda qo‘llash vaqti kelganda, barcha tafsilotlarni Cowork’ga qaytadan tushuntirishiga to‘g‘ri kelardi. Bu juda asabiy holat edi. Yangi yangilanishdan so‘ng Claude bir tom ostidagi ikkita alohida mahsulot emas, balki uzluksiz ishlaydigan yagona yordamchidek taassurot qoldiradi.
Anthropic bunga konferensiya uchun rahbarga yuboriladigan yangilanish yoki tadbir kun tartibini tayyorlash misolini keltiradi. Cowork oldingi suhbatlar sababli mavzuga oid ma’lumotlarni allaqachon tushunib turadi. Masalan, konferensiyada nechta kishi qatnashishi, tadbir qaysi shaharda o‘tishi va unda kimlar ma’ruza qilishi kabi ma’lumotlarni biladi. Foydalanuvchi ularni qaytadan kiritishi shart bo‘lmaydi.
Bundan tashqari, Claude endi suhbat yakunlangach, butun muloqotni umumlashtirish o‘rniga, suhbat davomida mavzularni xotirasiga qo‘shib boradi. Bu chat va Cowork o‘rtasida almashishni osonlashtiradi: yangi xotiralar tezroq yangilanadi va suhbat hali tugamagan bo‘lsa ham, har ikki muhitda ulashiladi.
Anthropic ma’lumotlariga ko‘ra, odatiy holatda Claude foydalanuvchining sog‘lig‘i, irqi, etnik kelib chiqishi, diniy qarashlari, siyosiy qarashlari, gender identifikatsiyasi va boshqa shaxsiy yoki maxfiy ma’lumotlarini saqlamaydi. Biroq xohlovchilar “include sensitive topics in memory” sozlamasini yoqib, bunday ma’lumotlarni ham xotiraga qo‘shishga ruxsat berishi mumkin. Ilova maxfiy mavzu xotiraga saqlanganida foydalanuvchini ogohlantiradi.
Shu bilan birga, kompaniya ayrim ma’lumotlar hech qachon saqlanmasligini aytmoqda. Jumladan, davlat tomonidan berilgan shaxsni tasdiqlovchi hujjat raqami, Social Security raqami, sudlanganlik tarixi, immigratsiya maqomi yoki foydalanish qoidalariga zid boshqa ma’lumotlar xotiraga kiritilmaydi.
Xotira funksiyasi veb, kompyuter va mobil qurilmalardagi Free, Pro va Max tariflarida sukut bo‘yicha yoqilgan. iOS va Android foydalanuvchilari esa ilovani eng so‘nggi versiyaga yangilashi kerak.