Gmail va Google Docs’da Gemini’ni qanday o‘chirish mumkin
Google Docs va Gmail’da yangi AI panellari hamda turli takliflar paydo bo‘lmoqda.
Google Docs va Gmail’da yangi AI panellari hamda turli takliflar paydo bo‘lmoqda. Hujjat va xatlar yozishda Gemini yordamidan foydalanishni istamasangiz, bu funksiyalarni qanday o‘chirish mumkinligini ko‘rsatamiz.
Texnologiya kompaniyalari, foydalanuvchi buni xohlaydimi-yo‘qmi, o‘zining sun’iy intellekt funksiyalaridan foydalanishga undash uchun bor imkonini ishga solmoqda. Ular dastur interfeyslariga yangi tugmalar qo‘shadi, qalqib chiquvchi tavsiyalar orqali foydalanuvchini bosishga va AI vositalaridan muntazam foydalanishga chorlaydi.
Masalan, Google ayrim foydalanuvchilar uchun Google Docs oynasining pastki qismida katta Gemini panelini joriy qilmoqda. Men bu funksiyani ilk bor aprel oyida, muharrirlar bilan hamkorlikda ishlatadigan Google Docs hisobimda ko‘rganman. Ko‘rinishidan, men bu imkoniyatni sinab ko‘rish uchun tanlangan foydalanuvchilar guruhiga kirgan ekanman. Bu oynani hech qachon ko‘rmagan tanishlarim ham bor. So‘nggi haftalarda esa u ayrim foydalanuvchilarda paydo bo‘lgani haqida xabarlar chiqdi. Demak, funksiya hammada bir xil ko‘rinmayapti.
Agar sizda ham shu panel paydo bo‘lgan bo‘lsa va uni ekranda ko‘rishni istamasangiz, yaxshi xabar bor: katta panelni yashirish juda oson.
Menyu panelidagi Gemini tugmasini bosing. Keyin Bottom bar preferences bandi ustiga kursorni olib boring va Turn off variantini tanlang.
Justin Pot taqdim etgan surat
Shundan so‘ng panel yo‘qoladi va boshqa xalaqit bermaydi.
Agar Google Docs’dagi barcha AI funksiyalarini butunlay olib tashlamoqchi bo‘lsangiz, buni ham amalga oshirish mumkin. Google Docs’da Gemini menyusi kabi elementlar ko‘rinmasligi uchun ikki yo‘l bor. Birinchi usul ayrim foydalanuvchilarda ishlayapti, boshqalarida esa yo‘q: Gmail’dagi sozlamani o‘zgartirish kerak. Ikkinchi usul esa hammada ishlayotganga o‘xshaydi — Chrome kengaytmasini o‘rnatish.
Avval muhim jihatni aytib o‘tish kerak. Shaxsiy Google hisoblarida — odatda @gmail.com manziliga ega hisoblarda — bu jarayon kompaniya hisoblaridan farq qiladi. Google Workspace’dan foydalanadigan tashkilot hisoblarida esa AI funksiyalarini qaysi foydalanuvchilar ko‘rishini administrator belgilaydi.
Shuning uchun ish joyingizda Google Workspace’dan foydalansangiz, AI funksiyalarini faqat IT jamoasi o‘chira oladi. O‘zingiz mustaqil ravishda ko‘p narsa qila olmaysiz. Istasangiz, IT xodimini ko‘ndirish uchun unga pechenye olib borib ko‘rishingiz mumkin.
Shaxsiy hisob egalari sozlamalarni o‘zgartirishda biroz ko‘proq imkoniyatga ega. Ammo kerakli parametrni topish oson emas: u Gmail ichida joylashgan.
Gmail hisobingizni oching va yuqori o‘ng burchakdagi tishli g‘ildirak belgisini bosing. Keyin See all settings bandini tanlang. Shundan so‘ng General yorlig‘ida Smart features bo‘limini topguningizcha pastga aylantiring.