Google: Gemini modellari 2026-yil may oyida uchta kompaniya tizimini buzgan
Uchinchi tomon kiberxavfsizlik kompaniyasi tajriba uchun sinovdan o‘tkazilayotgan Gemini modellariga tasodifan internetga chiqish imkonini bergan.
Uchinchi tomon kiberxavfsizlik kompaniyasi tajriba uchun sinovdan o‘tkazilayotgan Gemini modellariga tasodifan internetga chiqish imkonini bergan.
So‘nggi paytlarda sun’iy intellekt kompaniyalari o‘zlarining eng yangi va kuchli modellaridan ba’zilari real dunyoda ruxsatsiz xakerlik harakatlarini amalga oshirgani haqida xabar berishi odatiy holga aylanmoqda. So‘nggi oylarda ilg‘or Gemini modellarini chiqarishda ortda qolib kelgan Google shu paytgacha “nazoratdan chiqqan AI” muhokamalarida deyarli tilga olinmagandi. Biroq The Wall Street Journal xabaridan keyin Google 2026-yil may oyida o‘tkazilgan sinov vaqtida Gemini modellari uchta kompaniya tizimiga kirganini tasdiqladi. Shunga qaramay, bu hodisaning ko‘lami avvalgi AI xakerlik holatlaridagidek xavotirli yoki hayratlanarli emas.
Hujum kiberxavfsizlik kompaniyasi Irregular o‘tkazgan sinov vaqtida yuz bergan. Bir nechta Gemini modeli yopiq muhitda AI’ning kiberxavfsizlik imkoniyatlarini tekshirishga mo‘ljallangan “capture the flag” mashqida qatnashgan. Modellarga shu muhit ichidagi soxta kompaniya haqidagi ma’lumotlarni topish topshirilgan. Soxta kompaniyaga haqiqiy kompaniyalardan birining nomi berilgandi. Irregular modelning o‘z serverlaridan tashqarida ishlashiga yo‘l qo‘ymasligi kerak edi, ammo noto‘g‘ri sozlama sabab Gemini internetga chiqish imkoniga ega bo‘lgan.
Gemini internetni titkilay boshlagach, soxta tizimlar o‘rniga haqiqiy infratuzilmalarni nishonga olgan. Uchta holatdan birida model kompaniyaning onlayn xizmatlariga kirish uchun parollarni birin-ketin taxmin qilgan. Qolgan ikki holatda esa Gemini ochiq dasturiy ta’minot repozitoriylarini qidirib, kompaniyalarga tegishli kirish ma’lumotlarini topgan. Bu ma’lumotlar repozitoriylarga tasodifan joylab qo‘yilgan edi.
Xabarlarga ko‘ra, uchala sinovda ham Google modellari haqiqiy kompaniyalar serverlariga kirganini anglagach, harakatini to‘xtatgan. Shundan so‘ng Irregular sozlamalarni o‘zgartirib, AI’ning internetga chiqishini bloklagan. Ko‘rinishidan, Irregular dastlab bu hodisani batafsil tekshirishga arzigulik deb hisoblamagan. Hatto boshqa AI xakerliklari haqidagi xabarlar chiqqanidan keyingina, iyul oyida Google’ga bu buzib kirishlar haqida ma’lum qilgan. Hodisadan xabar topgach, Google kompaniyalarni ogohlantirdi. Umid qilamizki, ular parol xavfsizligini kuchaytiradi.