Imarat Development asoschisi Marat Xamdamov jinoyat ishi doirasida qo‘lga olindi
Avvalroq Toshkent shahar IIB developer kompaniya rahbariyatiga nisbatan tergov boshlanganini ma’lum qilgandi.
Avvalroq Toshkent shahar IIB developer kompaniya rahbariyatiga nisbatan tergov boshlanganini ma’lum qilgandi.
Imarat Development qurilish kompaniyasi bilan bog‘liq tadbirkor Marat Xamdamov jinoyat ishi doirasida qo‘lga olindi. Bu haqda Gazeta.uz Toshkent shahar Ichki ishlar bosh boshqarmasiga tayanib xabar berdi.
Huquqni muhofaza qiluvchi organlar ma’lumotiga ko‘ra, tergov doirasida ikki kishi — M.X. va J.A. — qo‘lga olingan. Xamdamov ish bo‘yicha gumon qilinuvchi sifatida jalb etilgan.
Jinoyat-protsessual kodeksining 227-moddasida surishtiruvchi, tergovchi yoki prokuror qarori bilan shaxsni ushlab turish tartibi belgilangan. Qo‘lga olingan odam darhol eng yaqin ichki ishlar bo‘limi yoki boshqa huquqni muhofaza qiluvchi organga olib borilishi kerak.
J.A. bosh harflari bilan ko‘rsatilgan ikkinchi shaxsning kimligi oshkor qilinmagan. Toshkent shahar IIB qo‘lga olinganlarga nisbatan ayblov e’lon qilingan-qilinmagani yoki ularga qanday ehtiyot chorasi qo‘llanishi mumkinligiga ham aniqlik kiritmagan.
Jinoyat ishi
1 noyabr kuni Toshkent shahar Ichki ishlar bosh boshqarmasi Imarat Development developer kompaniyasi faoliyati yuzasidan tergovga qadar tekshiruv boshlanganini ma’lum qildi. Huquqni muhofaza qiluvchi organlar xabariga ko‘ra, bir guruh fuqarolar kompaniya faoliyatidan noroziligini bildirgan va uning rahbariyatiga nisbatan qonuniy choralar ko‘rishni so‘ragan.
Imarat Development Toshkent viloyatining Quyichirchiq tumanidan turar joy majmuasi qurish uchun yer tanlagan. Vaholanki, xaridorlarga uylar Toshkent shahridan berilishi va’da qilingan. Ayrim xaridorlar loyiha joylashuviga qarshi chiqib, pullarini qaytarishni talab qilgan, biroq mablag‘larini ololmagan.
Toshkent shahar IIB Tergov boshqarmasi Jinoyat kodeksining 168-moddasi — firibgarlik hamda 192-11-moddasi — nodavlat tashkilotlar mansabdor shaxslarining vakolatlarini suiiste’mol qilishi bo‘yicha jinoyat ishini qo‘zg‘atgan.
Bayonotda aytilishicha, tergov Toshkent shahar IIB va prokuratura rahbariyati nazoratida olib borilmoqda. Tergov yakunlangach, qonunchilikka muvofiq qaror qabul qilinadi.
Bahsli holatlar
Avvalroq Kun.uz Imarat Development brendi ostidagi loyihalardan xonadon sotib olgan fuqarolarning qurilish kechikayotgani va pullarini qaytarib olish qiyin bo‘layotgani haqidagi shikoyatlarini yoritgandi. Xaridorlarning aytishicha, bir nechta turar joy majmuasida 2025 yilda topshirilishi va’da qilingan xonadonlar hali berilmagan.