Meta yangi AI modelidan qanday foydalanishingizni ko‘rish uchun pul to‘laydi
Ko‘plab AI vositalari foydalanuvchiga xizmat provayderi kelajakdagi modellarni yaxshilashi uchun o‘z foydalanish ma’lumotlarini ulashishdan bosh tortish…
Ko‘plab AI vositalari foydalanuvchiga xizmat provayderi kelajakdagi modellarni yaxshilashi uchun o‘z foydalanish ma’lumotlarini ulashishdan bosh tortish imkonini beradi. Meta esa bu yondashuvga narx belgiladi. Kompaniya kod yozish va boshqa agentlarni boshqarish uchun mo‘ljallangan yangi Muse Spark modeli bo‘yicha o‘z so‘rovlari va model javoblarini ulashib, kelajakdagi modellarni ishlab chiqishga “hissa qo‘shadigan” foydalanuvchilarga o‘rtacha 95 foiz chegirma taklif qilmoqda.
Standart shartlarda 1 million kiruvchi token narxi 1.25 dollar bo‘lsa, hissa qo‘shuvchilar uchun bu atigi 10 sent turadi. Chiquvchi tokenlarning standart narxi esa har million token uchun 4.25 dollar. Contributor tarifida xuddi shu hajm 20 sentga tushadi.
Meta trening ma’lumotlarini to‘plashda ancha qiyinchiliklarga duch kelmoqda. Joriy yil boshida kompaniya xodimlarining kompyuterdan foydalanishini kuzatish tashabbusini boshlagan edi. Bu reja ichkarida keskin tanqid qilindi va iyun oyida to‘xtatib qo‘yildi. Kompaniya yangi tarif modeli haqida TechCrunch savollariga javob bermadi.
Bunday foydalanuvchi ma’lumotlari agentlarga asoslangan vositalarni yaxshilash uchun juda muhim. “2025-yil aprelidan 2025-yil oktabrigacha kod yozuvchi agentlar imkoniyatida katta sakrash kuzatilganining sababi shuki, Claude Code sukut bo‘yicha barcha kod yozish sessiyalarini saqlab, ulardan reinforcement learning orqali treningda foydalangan”, — dedi o‘tgan oy TechCrunch nashriga ochiq kodli Pi harness dasturini ishlab chiquvchi Mario Zechner.
Biroq model yaratuvchilari endi agentlarga asoslangan vositalarni dasturiy ta’minot ishlab chiqishdan tashqari sohalarda ham joriy etishga intilayotgan bir paytda, bu vositalarni baholash va takomillashtirish oson emas. Ko‘plab professional jarayonlar murakkab bo‘lib, ularda raqamli izlar ham yetarli emas.
Prinston universitetining kompyuter fanlari professori Arvind Narayanan yirik kompaniyalar o‘z ma’lumotlaridan modelni o‘qitishda foydalanilishini istamasligi haqida yetarlicha dalillar borligini ta’kidladi.
“Ular tokenlar bo‘yicha haq olinadigan Enterprise tariflaridan foydalanishda davom etmoqda. Vaholanki, Claude Max va ChatGPT Pro kabi obunaga asoslangan iste’molchi tariflari 10–20 baravar, ba’zan undan ham ko‘proq arzon! Tariflar o‘rtasidagi asosiy farq ma’lumotlarni saqlash va korporativ IT boshqaruvida”, — deb yozdi u ijtimoiy tarmoqdagi sahifasida.
Ehtimol, Meta aynan shu holatni hisobga olib, kompaniyalarga bunday ma’lumotlarni taqdim etgani uchun bevosita kompensatsiya taklif qilmoqda. Kompaniyaning tariflar qo‘llanmasida contributor darajasi “ma’lumotlaringiz asosida trening o‘tkazishga ruxsat beriladigan prototiplar yaratish, integratsiyalarni sinash va tajribalarni kengaytirish uchun kirish to‘sig‘ini pasaytiradi”, deb qayd etilgan.
Narayanan fikricha, bu yondashuv yirik kompaniyalarni qaysi ma’lumotlar haqiqatan ham maxfiy va mulkiy ekanini, qaysilarini esa model provayderlari bilan ulashish mumkinligini sinchiklab ajratishga undashi mumkin.
Mazkur tizim ilg‘or AI modellarini ishlab chiquvchi kompaniyalar o‘rtasidagi kuchayib borayotgan narx raqobatiga ham ta’sir qilishi mumkin. Kecha taqdim etilgan Anthropic kompaniyasining yangi Fable va Mythos modellari keshlangan tokenlarni qayta ishlash narxini pasaytirgan. OpenAI esa iyul oyi oxirida o‘zining so‘nggi modellariga katta chegirmalar joriy qilgan edi.