Oddiy PS5’ga ham AI yordamida tasvirni yaxshilash funksiyasi keldi
Marvel’s Wolverine va Ghost of Yōtei — Quick Spectral Super Resolution funksiyasini qo‘llab-quvvatlaydigan ilk o‘yinlar.
Marvel’s Wolverine va Ghost of Yōtei — Quick Spectral Super Resolution funksiyasini qo‘llab-quvvatlaydigan ilk o‘yinlar.
Sony Interactive Entertainment oddiy PS5 konsoliga AI yordamida tasvirni yaxshilash texnologiyasini qo‘shdi. Bugundan boshlab Marvel’s Wolverine va Ghost of Yōtei o‘yinlari uchun yangi grafik sozlamalarni joriy etuvchi yangilanishlar tarqatilmoqda. Shu tariqa, ular Quick Spectral Super Resolution (QSSR) funksiyasini qo‘llab-quvvatlaydigan ilk o‘yinlarga aylandi. Sony bu texnologiya tasvir tafsilotlari va barqarorligini “sezilarli darajada yaxshilashi”ni aytdi. Kompaniya, shuningdek, bundan buyon har bir PlayStation ishlab chiquvchisi o‘z o‘yiniga QSSR’ni qo‘sha olishini bildirdi.
Sony yuqori unumdor PS5 Pro ikki yil avval chiqarilganidan beri unda PlayStation Spectral Super Resolution (PSSR) texnologiyasini taklif qilib kelmoqda. Kompaniya shu vaqt davomida ushbu texnologiyani muntazam takomillashtirdi. Sony blogidagi postda aytilishicha, o‘yinchilar va ishlab chiquvchilar bu imkoniyatni kuchsizroq oddiy PS5’ga ham olib kelish mumkinmi, deb so‘ragan.
QSSR Sony AMD bilan hamkorlikda olib borgan loyiha asosida yaratilgan. Kompaniya oddiy PS5’da AI yordamida tasvirni yaxshilash imkoniyati “soddalashtirilgan neyron tarmoq arxitekturasi” va “unumdorlikni maksimal darajada oshirish uchun qo‘lda moslashtirilgan yechim” tufayli paydo bo‘lganini ta’kidladi.
Wolverine o‘yinini ishlab chiqayotgan Insomniac Games kompaniyasining texnologiyalar bo‘yicha rahbari Mike Fitzgerald bu texnologiya “muhitdagi har bir pikselning aniqligi va barqarorligini oshiradi”, dedi. Uning so‘zlariga ko‘ra, QSSR Logan boshdan kechiradigan ulkan sarguzasht davomida Madripoorning gavjum ko‘chalari, Shinjukuning zich va tor xiyobonlari hamda boshqa ko‘plab joylarda qo‘shimcha tafsilotlarni yaxshiroq ko‘rsatishga yordam beradi.
QSSR Ghost of Yōtei o‘yiniga Sucker Punch Productions ushbu loyiha uchun qo‘shimcha hikoya va The Last of Us Part 2’dagi No Return rejimiga o‘xshash roguelike rejimini o‘z ichiga olgan to‘liq nashrni chiqarayotgan kuni qo‘shilmoqda. O‘yinga allaqachon ega bo‘lganlar ushbu nashrga 15 dollar evaziga yangilanishi mumkin.