Palantir rahbari Alex Karp: AI davrida neyroxilma-xil xodimlar muvaffaqiyat qozonadi. Autistik psixolog uning fikrida jon borligini aytmoqda
Psixolog Daniel Wendler neyroxilma-xil insonlarni haddan tashqari ulug‘lashdan ogohlantirdi.
Psixolog Daniel Wendler neyroxilma-xil insonlarni haddan tashqari ulug‘lashdan ogohlantirdi.
Palantir bosh direktori Alex Karp bir paytlar AI davrida neyroxilma-xil insonlar muvaffaqiyat qozonishini aytgandi. O‘zi ham autistik bo‘lgan psixolog milliarderning fikrida jon borligini tan oladi. Biroq uningcha, neyroxilma-xil xodimlarning ustunligi ko‘pchilik o‘ylagandek bo‘lmasligi mumkin.
Disleksiyasi bo‘lgan Karp bu yil boshida biznesga bag‘ishlangan TBPN podkastiga bergan intervyusida neyroxilma-xil insonlar nega kelajakda muvaffaqiyat qozonishi mumkinligini tushuntirdi.
“AI davrida kelajagingiz borligini bilishning, asosan, ikki yo‘li mavjud. Birinchisi — kasbiy tayyorgarlikka ega bo‘lish. Ikkinchisi esa — neyroxilma-xil bo‘lish”, dedi Karp.
Karp avvalroq disleksiya bilan kurashgani unga “erkin fikrlashni” o‘rganishga yordam bergan “shakllantiruvchi bosqich” bo‘lganini aytgan. U Palantir’ga asos solib, uni taxminan 470 milliard dollarlik ulkan dasturiy ta’minot kompaniyasiga aylantirishdagi muvaffaqiyatini ham disleksiya bilan kurashish tajribasi bilan bog‘lagan. Karp 2003 yilda Peter Thiel, Joe Lonsdale, Stephen Cohen va Nathan Gettings bilan birga asos solgan kompaniyani yigirma yildan ortiq vaqt davomida boshqarib kelmoqda.
TBPN bilan suhbatda Karp AI ish joylarida qaysi ko‘nikma va qarashlar qadrlanishini o‘zgartirayotganini ta’kidladi.
“Ular o‘rganishi kerak bo‘lgan narsa — ko‘proq ijodkor bo‘lish, masalalarga boshqa tomondan qarash va o‘ziga xos narsa yarata olish”, dedi u.
Boshqacha fikrlash
Neyroxilma-xillik bo‘yicha ixtisoslashgan va o‘zi ham autistik bo‘lgan psixolog Daniel Wendler AI ish muhitini o‘zgartirayotgan bir paytda boshqacha fikrlaydigan insonlar ustunlikka ega bo‘lishi mumkin, degan fikrga qo‘shiladi. Uning aytishicha, texnologiya kompaniyalarni o‘zgarayotgan biznes muhitiga moslashishga majbur qilayotgan sharoitda neyroxilma-xil insonlarning o‘ziga xos qarashlari ayniqsa muhim.
“Agar xonada AI bilan shug‘ullanadigan, uni tahlil qiladigan neyroxilma-xil fikrlaydigan odamlar bo‘lmasa, ularning o‘ziga xos nuqtayi nazaridan mahrum bo‘lasiz”, dedi Wendler Fortune nashriga.
Uning fikricha, kompaniyalar AI ishlar va ish joylarini qanday o‘zgartirayotganini qayta ko‘rib chiqayotgan bir paytda, bunday qarashlar xodimni qimmatli qiladigan fazilatlar va vazifalarni bajarish usullari haqidagi eski tasavvurlarni o‘zgartirishga yordam berishi mumkin.
Biroq Wendler autizm, ADHD yoki disleksiyasi bo‘lgan insonlarni qamrab oluvchi neyroxilma-xil xodimlar texnologiyadan foyda olish uchun alohida qulay mavqega ega bo‘lishi mumkinligining yana bir sababini ham ko‘radi.