Sakkiz shtat OpenAI’ni sudga berdi: ChatGPT bolalarga zarar yetkazib, kattalarni chalg‘itgan
Meta bolalar xavfsizligi masalasida 18 milliard dollarlik kelishuvga rozi bo‘lganidan keyin shtatlarning texnologik kompaniyalar ustidan nazorati ijtimoiy…
Meta bolalar xavfsizligi masalasida 18 milliard dollarlik kelishuvga rozi bo‘lganidan keyin shtatlarning texnologik kompaniyalar ustidan nazorati ijtimoiy tarmoqlardan AI xizmatlariga ham kengaydi.
AQShning kamida sakkizta shtati sun’iy intellekt giganti OpenAI’ni sudga berdi. Da’volarda kompaniyaning mashhur chatbot modeli shtatlarning iste’molchilarni himoya qilish haqidagi qonunlarini buzib, bolalarga zarar yetkazgani va kattalarni chalg‘itgani aytiladi.
Ayova shtati da’vosiga ko‘ra, kompaniyaning ChatGPT chatboti xavfli tibbiy maslahatlar bergan, foydalanuvchilarda paranoyani kuchaytirgan, shuningdek, ayrim odamlarni boshqalarga zarar yetkazish yoki o‘z joniga qasd qilishga undagan. Da’voda chatbotlar o‘zini hamdard va foydalanuvchining fikriga qo‘shiladigan tizimdek ko‘rsatgani, aslida esa zaif holatdagi odamlarning ishonchidan foydalangani ta’kidlanadi.
«OpenAI bolalarga zarar yetkazyapti va Ayova aholisini aldayapti», — dedi Ayova bosh prokurori Brenna Bird bayonotida.
OpenAI o‘z bayonotida ChatGPT’ga bolalarni himoya qilish uchun xavfsizlik mexanizmlari allaqachon o‘rnatilganini bildirdi. Kompaniya model xavfsizligini yanada yaxshilashda davom etishini aytdi.
Bu shtatlar iste’molchilarni himoya qilish to‘g‘risidagi qonunlarga tayangan holda bergan so‘nggi da’volardir. Ularda AI chatbotlari va ijtimoiy tarmoq platformalarini taklif qilayotgan texnologik gigantlar bolalarga zarar yetkazayotganlikda ayblanmoqda. Chorshanba kuni shtat sudlariga alohida da’volar kiritgan hududlar — Arizona, Arkanzas, Aydaho, Kanzas, Montana, Nebraska va G‘arbiy Virjiniya.
Arizona o‘z da’vosida ChatGPT o‘smirlarni shaxsiy ma’lumotlarini chatbot bilan bo‘lishishga undashini aytadi. Ayrim holatlarda esa ularni bu ma’lumotlarni ota-onasi, huquq-tartibot idoralari yoki do‘stlariga aytmaslikka ko‘ndiradi.
Da’volarda keltirilishicha, ChatGPT dunyodagi eng mashhur chatbot bo‘lib, AQSh bozorining qariyb yarmini egallagan.
Avgust oyida Meta Facebook va Instagram platformalarida bolalar xavfsizligini kuchaytirishga rozi bo‘ldi. Bu o‘smirlarning ijtimoiy tarmoqlarga qaramligi yuzasidan o‘tkazilgan sud jarayonini yakunlagan 18 milliard dollarlik tarixiy kelishuv doirasida amalga oshirildi. Shuningdek, kelishuv deyarli barcha shtatlar kiritgan da’volarni ham hal qildi.
Texnologiya sanoatiga qarshi bir nechta shtat birgalikda bergan da’volar o‘z samarasini ko‘rsatdi. Meta zimmasiga olgan xavfsizlik choralari butun sanoat uchun majburiy bo‘lmagan bo‘lsa-da, kompaniya raqiblarini ham shunga o‘xshash choralarni joriy etishga tezda chaqirdi.
OpenAI vakili Drew Pusateri bayonotida kompaniya shtatlar bilan «faqat bitta kompaniyaga emas, butun AI sanoatiga tatbiq etiladigan amaliy siyosatlarni ishlab chiqish» ustida ishlashga qat’iy bel bog‘laganini aytdi.
OpenAI ma’lumotiga ko‘ra, ChatGPT 13 yosh va undan kattalar uchun mo‘ljallangan. 18 yoshga to‘lmagan foydalanuvchilar undan foydalanish uchun ota-onasi yoki vasiyining ruxsatini olishi kerak. O‘smirlar uchun chatbot o‘ziga zarar yetkazish, zo‘ravonlik, ovqatlanish buzilishlari, shuningdek, ochiq jinsiy yoki grafik mazmundagi kontentga duch kelish ehtimolini kamaytirishga qaratilgan himoya vositalariga ega.