YouTube Music striming platformalarini to‘ldirayotgan AI musiqalar uchun yangi belgilarni joriy qildi
Bu belgi pleyer sahifasida ko‘rinadi. Unda AI yordamida to‘liq yaratilgan yoki kompozitsiya va vokal kabi ayrim jarayonlarda sun’iy intellektdan…
Bu belgi pleyer sahifasida ko‘rinadi. Unda AI yordamida to‘liq yaratilgan yoki kompozitsiya va vokal kabi ayrim jarayonlarda sun’iy intellektdan foydalanilgan qo‘shiqlar ko‘rsatiladi.
YouTube Music chorshanba kuni generativ AI yordamida yaratilgan qo‘shiqlar haqida ko‘proq shaffoflikni ta’minlashga qaratilgan yangi belgilash tizimini ishga tushirganini e’lon qildi. Endi tinglovchilar AI ishlatilgan treklarni, jumladan, uning musiqa yaratish yoki vokal yozish jarayonidagi ishtirokini ham oson aniqlay oladi.
Belgi pleyer sahifasida joylashadi. Unga bosilganda, AI trekni yaratishning aynan qaysi bosqichida va qanday rol o‘ynagani haqida qo‘shimcha ma’lumot beriladi.
Muhimi, bu belgilar asosiy YouTube ilovasida ham ko‘rsatiladi.
YouTube AI yordamida yaratilgan musiqalarni aniqlash uchun turli musiqa hamkorlari bilan ishlagan va o‘zining aniqlash vositalarini ishga tushirgan. Kompaniyaning yordam sahifasida aytilishicha, YouTube bilan ishlaydigan hamkorlar generativ AI’dan foydalanilganini uchta toifadan biri orqali ko‘rsatishi mumkin: Fully Gen AI, Partly Gen AI yoki No Gen AI.
“Fully Gen AI” belgisi butunlay AI tomonidan yaratilgan treklarga qo‘yiladi. “Partly Gen AI” esa ijodkorlar AI yaratgan ayrim qismlardan foydalanib, ularga o‘zlari ijro etgan jonli elementlarni qo‘shgan asarlarni anglatadi. Auto-Tune kabi ovoz balandligi va ohangini tuzatish vositalari yordamida tahrirlangan treklar esa “No Gen AI” toifasiga kiradi.
Bu qadam AI yaratgan musiqalar striming xizmatlarida tez ko‘payayotgan bir paytda tashlandi. Ko‘plab platformalar bunday kontentga nisbatan o‘z yondashuvini ishlab chiqmoqda. Masalan, Apple Music joriy yil oxirida AI Transparency Tags dasturi doirasida “Made With AI” belgilarini joriy etishni rejalashtirmoqda. Spotify’da ham AI belgilaridan tashqari, musiqiy spamni aniqlab filtrlovchi tizim mavjud.
Deezer esa eng qat’iy choralarni ko‘rgan platformalardan biri bo‘ldi. Kompaniya iyul oyida har kuni qariyb 90 000 ta to‘liq AI yordamida yaratilgan trekni qabul qilayotganini ma’lum qilgan. Platforma aniqlangan AI musiqalarini belgilaydi, ularni algoritmik tavsiyalar va muharrirlar tuzgan pleylistlarga kiritmaydi. Shuningdek, firibgarlik yo‘li bilan olingan tinglovlar uchun royalti to‘lamaydi. Kompaniya foydalanuvchilarga AI yaratgan musiqalarni umuman ko‘rsatmaslik imkonini beruvchi funksiyani ham ishlab chiqmoqda.
TIDAL ham butunlay AI tomonidan yaratilgan deb topilgan yozuvlarni belgilaydi, tinglovchilarga ularni o‘chirib qo‘yish imkonini beradi va bunday yozuvlarni royalti taqsimotiga qo‘shmaydi.
YouTube esa, aksincha, keng qamrovli cheklovlardan ko‘ra oshkor qilishga urg‘u bermoqda. Yangi belgilar tinglovchilarga musiqa yaratilishida AI qanday rol o‘ynaganini tushuntirish uchun joriy etildi. Biroq trekda AI’dan foydalanilgani uning monetizatsiyaga yaroqsiz bo‘lishini anglatmaydi.
YouTube o‘zi ham AI yordamida musiqa yaratish imkoniyatlarini sinab ko‘rmoqda. Jumladan, Dream Track vositasi ayrim ijodkorlarga hamkorlik qilayotgan san’atkorlarning AI yordamida yaratilgan ovozlari ishtirokidagi saundtreklarni yaratish imkonini beradi.